陀住bb嘅10個月，每分每秒都喺度諗，到底囝囝係咩樣？多頭髮定光頭仔？單眼皮定雙眼皮呢？等咗咁耐終於可以抱住佢出院返屋企啦~
但苦盡甘來之前，難以避免要面對恐怖嘅十級陣痛……上回講到穿水足足23小時先落產房，喺裡面靠老公拖住手支持，以及笑氣止痛，捱過生B+縫針+推胎盤劇痛
終於可以推上產後房，老公幫我拎齊行裝，我就抱實懷中嘅包包，姑娘將我哋推到E2產後病房。
包包好快被帶走見兒科醫生及打針，老公安頓好就去幫我買飯，生仔仲攰過跑幾次馬拉松，真係餓到暈～中午呢段探病時間亦交帶所有家人都唔好嚟探望，就得我同老公好好休息一下先
一個鐘探病時間好快就過，老公離開無幾耐包包就返嚟我身邊啦~個幾鐘不見真係如隔三秋，即刻抱實囝囝唔放亦開始埋身俾佢嘗試食人奶﹗
由於我穿水後超過24小時先成功生產，所以包包住院期間左手都種住豆豆要打幾次抗生素，一出世就要咁樣扎住隻手不停打針，其實真係好心痛……
產後6小時內要喺尿盤去到WEWE，去唔到就要插尿喉架啦﹗去完就可以喺有人陪同下試落床。住院期間要勤力啲去洗手間用沖洗瓶清洗傷口，如果唔係怕發炎，但生過BB嘅媽媽都知，無論順產定開刀，第一日落床都真係步步驚心……幸運地包媽床位喺最靠近洗手間嘅一角，眼見其他媽媽都真係好似<BB來了>咁喪屍慢步……
一直希望餵母乳，大家都知密密埋身可以有助快速上奶，但因為雙手筋膜炎而囝囝一出世就力大無窮，真係無法同佢鬥力好怕失手跌佢落地，姑娘就俾咗啲針筒我，開始密密手擠奶，見到一滴吸一滴
十幾分鐘後先吸到第一支1ML黃金初乳，真係滴滴皆辛苦呀﹗等探病時間就交俾老公餵，享受親子時間。
產後房同私家病房探病時間都係一樣，中午12點至1點，及5點至8點，嚴格限制每個床位每次兩個人入，門口有職員派卡仔要一換一先入到，一定要戴口罩，好在我放咗幾個喺走佬袋，家人唔記得拎都可以攞出去俾佢哋。
【包媽孕記】伊利沙白醫院QE L block登記方法及第一次產檢流程分享
夜晚就係單打獨鬥嘅時間啦，不停埋身餵奶同換片無限LOOP，外加要忍痛行去Toliet洗傷口，好在病房都無咩BB喊大合唱，但唔知點解我個床位好似無冷氣咁，不停全身出汗濕晒，個人又餓食包食餅乾，加上唔放心包包喺隔離，結果基本上成晚都係抱住佢
7點醫生巡房，同佢講肚對上胃嘅位置好痛，佢話應該係懷孕期器官擠壓宜家釋放返所以痛……之後終於有早餐食啦~
前一日午餐晚餐都有老公外賣，第一餐醫院餐，有粟米雞茸粥+餐包，好好食，唔使5分鐘就食清光啦﹗9點幾包包推咗去見兒科醫生，順便打抗生素及卡介苗，另外抽血做新生嬰兒代謝病篩查。
到下晝2點幾姑娘話私家房有位啦，聯同另外兩位媽媽拎齊行李推埋BB，一齊搭LIFT上A11
我同包包被分配到一間二等3人房
空間大啲，同埋每張床都配有一個U型母嬰枕方便餵奶，最緊要係啲冷氣終於正常啲啦，但最搞笑嘅其實我地分配到嘅產後房，係四人房2個媽媽住，即係私家房仲多人左哈哈哈
房入面有一部電視，大櫃自取病人服，同埋有洗水間沖涼房FOR房內媽媽使用
洗手盆設於近窗廁所門外，同產後房一樣係出偏熱嘅暖水
同產後房一樣，BB床仔掛住一疊紀錄進食換片嘅表格，自己要定時定侯做完MARK低
姑娘巡房時提我要再密啲擠奶同埋身，如果唔係怕包包無得一齊出院T.T聽到真係想喊出嚟，會質疑係咪自己懶搞到阿仔餓所以係咁喊？
4點幾姑娘巡房，我問佢BB係咪太餓所以不停喊，一開口我自己就開始喊……加上穿水前嗰晚已經無覺好瞓，加埋已經近48小時無休息過，已經去到抱住個仔就咁坐喺度瞓著，面色相當差，姑娘問我想佢地點幫忙。
未生之前喺網上見好多媽媽講，QE係母嬰醫院，只要一講諗住餵人奶，就點都唔俾補水奶，而好多媽媽住院時真係未上奶，有時會令BB進食太少排尿不足，黃疸指數高而無法一齊出院。
一開始我都會擔心，但姑娘問到我亦膽粗粗開口問：「可唔可以俾佢補奶呀？」姑娘溫柔地一口答應，仲問我想唔想學點餵，出去拎一杯水奶示範，原來包包已經可以一口氣飲30ML，擠出嚟嗰幾ML完全唔夠食，難怪之前喊得咁慘啦…邊個話BB出世頭幾日食緊儲糧唔食都得架…
姑娘仲話叫我如果真係好攰，可以推BB去護士站睇住一陣，交更會幫我交帶俾同事知。佢真係無呃我架，接近9點有夜更姑娘入嚟睇擠奶進度，然後推走bb照顧，我就秒睡了，隱約記得11點左右，有姑娘入嚟話bb喊得好誇張，見下晝有飲過水奶問我補唔補奶，我講左好之後，再有知覺已經係朝早5點幾……
6點幾bb又返嚟我身邊啦，8點幾醫生巡房檢查會陰傷口，話我今日可以出院啦，包包就有少少黃，要等見埋兒科醫生先知。10點鬆啲推走BB去沖涼，順便姑娘叫有興趣嘅媽媽可以一齊去上堂，連埋我3個媽媽一齊學點沖涼，姑娘真係快手到呢……三分鐘就沖完啦哈哈哈
返到房10點半左右有母乳姑娘巡房，其實都係QE做得好好嘅一樣服務，只要媽媽話想餵母乳，就會逐張床埋嚟睇埋身情況，糾正姿勢，提醒如果要擠奶出嚟餵，最好用杯唔好用奶樽以免BB乳頭混淆，循循善誘友善FEEL，都唔係網上講得咁恐怖啫。
每日探病時間，老公都有買飯俾我食，但食完見到送餐眼前一亮，嘩好豐富喎﹗試下一舊試下一舊唔覺意就食晒成個餐。
私家房每朝會俾表格揀定之後三餐食啲咩，有中餐西餐自行配搭，上咗私家房之後就叫老公唔使買飯LU
到下晝見埋醫生，包包可以同我一齊出院啦﹗等老公嚟到拎單去俾住院費&攞藥，就可以一家三口一齊返屋企啦^^
出院收費：第一日產前房&第二日產後房 $68@
+ 二等私家房一晚 $315
+ BB住院及日間程序費 $120
Total $571就完成呢項人生大大大project啦~
喺度想多謝QE婦產科嘅姑娘助產士同埋醫生，每一位醫護人員都好專業，亦無傳說中咁Harsh(起碼我身上真係無)﹗特別感謝產前房黃姑娘同助產士古姑娘，由準媽媽變真媽媽，喺醫院嘅兩三日，身心都好大挑戰，產前用分娩球，產後安排母乳姑娘逐位媽媽指導，臨出院仲有得學沖涼，留院48小時好似上湊B雞精班咁，快速上手。多謝QE婦產科上上下下幫忙=)
